EL GLAYÍU D'UN PAÍS

Guerres de mentira

2006-03-13T09:51:00.000-08:00

Avilés, Uviéu, Gozón, Villaviciosa... yá ta armada. Los nuesos políticos anden estes selmanes engarraos por cuenta d'onde mangar el Muséu de los Premios Príncipe d'España. Plenos estra-ordinarios, recoyíes de firmes, declaraciones na prensa.

La tapadera ye perfecta. Yá tienen tema pa tenenos entreteníos una temporaduca falando d'un Muséu que va crear tanta riqueza y va sacar a Asturies alantre (igual que los Premios Príncipe). Y ye que debe ser que toa esta comedia premio-monárquica debe tar dándonos de comer a los asturianos... y nós ensin enteranos.

Que mas da'l paru y la emigración de la nuesa mocedá, que mas da que tengamos la nuesa llingua y la nuesa cultura amorreciendo... Siempre nos quedarán Felipe y Letizia, Leonor y toa esa tribú d'estomados agradecíos, inteleutuales de mediu pelo y una plebe encantao aplaudiendo a la entrada del Teatru Campoamor.

Gobiernu y oposición al mesmu tiempu

2006-03-10T14:08:00.000-08:00

Taba sintiendo esti día la radio cuando dieron l'anuncia qu'Izquierda Unida presentaba nel Ayuntamientu d'Uviéu una moción en defensa del calter públicu de la Ciudá de Vacaciones de Perlora yá que'l Gobiernu del "Principado" ta por privatizala. Y lo primero que pasó pela mio cabeza foi: ¡¡¡otra vez!!!

Y foi, ye y, de xuru, que va ser otra vez qu'Izquierda Unida xuegue a ser gobiernu y oposición al mesmu tiempu.

Pal que nun tea mui puestu nel tema, Izquierda Unida gobierna n'Asturies en coalición col P$¿O?¡E! gracies a un alcuerdu políticu nel que los primeros arrenunciaron a promeses irrenunciables na campaña eleitoral a cambiu de dos conseyeríes y un puestín pal voceru del Bloque por Asturies, organización que s'amestó a la candidatura d'IU.

Demientres too esti tiempu IU vien faciendo constantemente'l duple papel. Ser gobiernu cuando interesa y ser oposición nel casu contrariu. Los 8 de setiembre, Día de la Nación Asturiana, Izquierda Unida convoca manifestaciones pa pidir al so propiu gobiernu la oficialidá del asturianu y l'autogobiernu.

Como lo de ser asturianista ye poco, tamién toca ser ecoloxista. Agora quieren "liderar" el Conceyu contra la Incineradora de Serín que quier manganos el so gobiernu. Eso si, votando a favor el so representante en Cogersa.

Y como nin asturianista, nin ecoloxista, lo que cumplen a la perfeición ye lo d'oportunista. Salen a la cai a la escontra de la Llei Orgánica d'Educación pero los sos diputaos en Madrid abstiénense nes votaciones.

Y yá por nun falar de los pidimientos de retirar simboloxía franquista nos conceyos onde tan na oposición y caltenela onde gobiernen.

Y lo triste de too esto, ye que n'Izquierda Unida sigue habiendo xente de lo mas competente y honrao, la pena ye que nun son los que remanen la organización.

Entamamos

2006-03-03T14:57:00.000-08:00

Bono, yá ta. Soi una mas de les munches persones qu'entamen un blog na rede de redes. Ye una sensación, polo menos, rara y enllena de preguntes ¿Lleeráme daquién? ¿Seré quien a caltener esti blog vivu? ¿Tendré temes abondo pa falar? Imaxino que, como en tolos entamos, les duldes dirán desapaeciendo, o non, col pasu de los díes y les selmanes.

En fin, pel momentu, esto ye lo qu'hai. Que vos preste.